info
Herzlich willkommen auf der Internetseite der Evangelisch-Lutherischen Kirchgemeinde Sehmatal-Neudorf!

Sie sind hier: Startseite » Nachricht anzeigen

Verrickte Zeitn

Veröffentlicht am: 23.11.2022, 10:13 Uhr - von: Sebastian

Is Gas un dor Strom sei teier wie noch nie. Immer mohl gibs verschiednes Zeich net ze kaafn, mol isses Klopapier alle, dann gabs kaum Katzn- un Hundefutter. Mir hohm in unnern Gartn bis Ende November Himbeer runner gedah un letztes Wochenend, do wars dann -13° kalt un is gob Schnee dorzu. Is sei grod schieh bissl verrickte Zeitn in danne mir lahm.

"Ja früher gabs su ewos net, do war alles besser", hehr iech itze schie de Arschtn sogn. Dos denk iech aber net. Noch bestännige Zeiten daht sich ah früher immer mohl wieder ewas ännern un is gab gruße Umbrüch. Dos vergassn aber Viele un schimpfn lieber auf die Zuständ heitzetoch und of de Regierung und überhaupt… Ja, in de letztn Ghar do kimmt mir dor Arzgebirger wie a engstirniger, schlacht gelaunter, uhzefriedner Schimpfbolzn vier. Ahgefange mit de Coronaproteste und Fackelspaziergänge, hie zun „Berggeschrey“ un nu „Vergreift euch nicht an unsrem Licht“. S’is fei schlimm, wenn mir hier nehr noch wattern und schimpfn könne un do drüber hieh wichtigere Sachn verliern.

Wie? Was verliern mor däh grod? Ich denk ganz scheen viel: In Friedn unnerenanner, de Fraad an su vielem wos mir hohm, in Glaabn an unnere Mitmenschn und an unnern Vater im Himmel, Traditionen, bei die kaaner meh miet macht, is Vereinslahm, egal ob im Sport oder in dor Kirch, de Beziehunge un de Rücksicht unnerenanner wert ah weniger… … un wenn mor su wetter machen, dann ah de Hoffnung, dos is schie irngdewie wetter gieht.

Ja, „Leise rieselt der Schnee“ spieln mir ah ganz oft im Posaunechor. Dor Pfarrer Eduard Ebel daht 1895 dos Lied hier dichtn. Un de Walt war ah domols schieh verrickt, guck ruhig mohl nei in de Geschichtsbicher. In dam Lied haßts aber drei mohl: „Freue Dich, Christkind kommt bald“. Also egahl wos is, unner Herrgot kimmt ze uns un dos is Grund zor Fraad. Kahne Schimpferei, kah Hass un Sorgn hobn Gewicht mehr…
Iech wünsch mor, dos mir Arzgebirger ah wieder mehr zor Ruh kumme, uns nimmer su aufregn über alles wos is, mehr zamm haltn un uns um ennanner kümmern. Un iech wünsch mor, dos mor alles, wos uns Kummer, Schmarz un Surgn macht, vier unnern Herrgott brenge un Vertraue off‘n hohm.

Un su wulln mir Bläser im Advent un später in dor Weihnachtszeit wieder naus gieh un mit unnerer Musik in Leitn in unnerm Ort inne Fraad machen, a Stückl Friedn wetter gabn und bezeugn, dos unner Herrgot ah heite noch do is un die verricke Walt in seine Händ hält. Beim lauschn auf Advents- und Weihnachtslieder kah mor Ruh un Ahdacht findn, sich überlegn, wos mor alles Guts in seim Labn hoht un ob eim de Schimpferei wirklich wetter brengt oder ob eim emmende jemand eifällt dam mor wos guts tue kah.


Dos ihr wisst, wu mir unnerwags sei un wann sich´s luhnt de Fanster emohl ahzekippn, stieht hier, wann mir wu ze hehrn sei:

Sundich 27.11. Do blosn mor erscht im Gottesdienst im neine und dann nochmittogs offn Weihnachtsmarkt. Dornoch sei mor su im fünfe rim im Mitteldorf unnerwachs.

Sunohmd 03.12. Do sei mor noch sechse vom Kirchturm ze hern.

Sundich 04.12. Do tunne mir im fünfe rim im Unnerdorf blosn.

Sundich 11.12. Zum Gottesdienst in Hammer im zahne un ab dor fünftn Stund in Kratschum tunne mir Advents- un Weihnachtslieder spieln.

Sunohmd 17.12. Do blosn mir wieder noch sechse vom Kirchturm.

Sundich 18.12. Do tunne mir im fünfe rim im Oberdorf blosn.

Heiligohmd 24.12. sei mir viermittogs im Unnerdorf ze hern un ohmds, su im sieme rim, blos mor zor Heilign Nacht vom Bergblick ins Dorf nei.

Am erschtn Weihnachtsfeiertoch spieln mor im zahne im Gottesdienst.


Inne ruhige un besinnliche Adventszeit wünscht eich dor Posaunechor.