Iech Iech Iech…

Veröffentlicht am: 29.11.2023, 21:42 Uhr - von: Sebastian

Dos gieht mir su offn Senkel ihr Leid. Iech hoh dann Eidruck, jeder guckt nehr noch of sich salber, of seins un alles annere zählt nischt. Un bluß kenn Handschloch ze viel machen.

Do fährt mor durnge Ort un muss immer wieder ahhaltn, weil irgendahns sei Auto wie su in dracking Schlüpper of de Stroß geschmissn hoht. De annern könne ja wartn un drim nim fahrn. Hauptsach iech tu kenn Schritt ze viel. Lieber Neidarfer, is sei dir gesocht: Laafn is gesund un jeder Gang macht schlank. Mor kah ruhig a Stückl vom Lodn wag parkn un annern net im Waag rim stieh.

Dann hots gerode su in arschten Schnee gemacht, do gieht is gestöhn schieh lus. Die Arbit mitm Schnee schippn, nehr schnell dos bissel Zeich of de Stroß oder zun Nachbarn gehaah, hauptsach Iech bieh fartig. Dos is wirklich net übertiebn, dos is in dor letztn Woch in Neidorf su passiert. Iech mecht die Leit am liebsten frogn, ob se schieh mol drüber noch gedacht hobn, vielleicht ah mohl bei de ältern Nachtbarn mieht ze schippn, bei sich sei se doch su schnell fartig mit ihrer Dünnbrettbohrerei.

Un dann wart sich über Zeich aufgerecht wie de „Klimakleber“ oder dos se (dor Staat, de biese Obrigkeit) ja de „Lichterfahrt“ verbietn wulltn. Do kah mor nehr noch mit‘m Kopp schütteln. Hoht sich schieh mohl in Neidorf jemand of dor Hauptstroß festgeklabbt? Also wos kümmerts dich? Un kahs manchmohl sei, dos is fürs fahrn of dor Stroß Regeln und Richtlinie gibt, wu de meistn ah in grußn Sinn hobn? Vielleicht weils dann for alle sicherer is un niemand vor Weihnacht uhnötig ins Gros beissn muss?

Mir scheint, net wenige Arzgebirger sei alte, faule „Schimpfbolzn“ wurn. Dor Sinn ewos mitenanner ze machen, is Gute ze sah oder jemandn mohl ze halfn, is wenig wurn in dare Zeit. Leit glabt mirs, iech hob do richtig schlachte Laune drüber, bieh richtig ahgefrassn un wess mir kenn Roht.

Dos Lied passt an dare Stell net nei. Un doch isses su, bei uns is Winter wurn un bis Weihnachtn warts erscht emohl ah zugeschneit bleim, egal ob‘s dir racht is oder net. Ja un am 24. is dor heilche Ohmd rah un is spielt kah Roll wie dir’s dormiet gieht. Ach un noch ewos: Ah itze, in dare Weihnacht is dor Herrgott net weit. Er will dir gern de Hand hie streckn, ze dir hieh kumme in deine Dunkelheit, in deine Schuld un in dei Chaos. Aber willst du dos überhaupt?

„Wenn draußn vom Himmel dor Schnee fällt“, dos Lied un viele annere spieln mir oft mit’m Posaunechor im Advent. Do find sich unnere Bläser im Dorf oder ofn Turm zesamme, dor Werner socht ah wos drah is, zählt auf un dann wert dos Lied gespielt, ah wenn mir net dornoch is oder mir dos Stückl net gefällt. Wos iech oder a annerer ahnzelner Bläser will, dos zählt do ahfach net. S‘is ah net immer scheen draussn ze spieln, machmohl tuts regne, ab un zu pleedert a lauts Auto dicht an uns vorbei un de Kält zieht eim ah in de Knochn nei.

Worum dann dos ganze, mor könnt ja ah in dor Stub dorham bleim? Weils scheen is annern ne Fraad ze machen, die vielleicht nimmer su ahfach naus kumme. Weils tiefn Friedn brengt, de Frohe Botschaft an de Leit in unnerm Ort wetter ze gabn. Un weil mor dorbei zesamme mit annern Bläsern unnerwachs is, danne is emmende net annersch gieht. Danke an alle in unnerm Posaunechor, die mit Fraad in dare Advents und Weihnachtszeit miet dorbei sei un ihr eignes „Iech“ hintn ah stelln.

Beim lauschn auf Advents- un Weihnachtslieder kimmst vielleicht ah du ins nochdenkn. Wu tut dei „Iech“ annern of de Nervn falln oder schodn? Wu kasst du dei eignes „Iech“ für annere mohl ganz hintn ahstelln? Wu dreht dei „Iech“ dich wag vom Jesuskind, dos dir de Hand hieh streckt.

Ich wünsch dir, dos es dir gieht wie mir in de letztn Gahr: Ganz egal wie ahgefrassn iech über manniche Sach gerode bieh, wie schlacht de letzte Zeit war oder mit was ich uhzefriedn bieh. Do drüber sei eignes „Iech“ hintn ah ze stelln, daht sich jedes Gahr spätestens ze Weihnachtn tiefe Fraad un tiefer Friedn eistelln.

Dos ihr wisst, wu mir unnerwags sei un wann sich´s luhnt de Fanster emohl ahzekippn, stieht hier, wann mir wu ze hehrn sei:

Sundich 03.12. Do blosn mor dreiviertl fünfe rim im Mitteldorf.
Sunohmd 09.12. Do sei mor noch sechse vom Kirchturm ze hern.
Sundich 10.12. Do blosn mor erscht im zahne im Gottesdienst un Ohmds dann im fünfe rim im Oberdorf.
Sundich 17.12. Zum Gottesdienst in Hammer im zahne un ab dor fünftn Stund in Kratschum tunne mir Advents- un Weihnachtslieder spieln.
Sunohmd 23.12. Do blosn mir wieder noch sechse vom Kirchturm.
Heiligohmd 24.12. sei mir viermittogs im Unnerdorf ze hern un ohmds, su im sieme rim, blos mor zor Heilign Nacht vom Bergblick ins Dorf nei..
Am erschtn Weihnachtsfeiertoch spieln mor im zahne im Gottesdienst.

Inne ruhige un besinnliche Adventszeit wünscht eich dor Posaunechor.