Gahr for Gahr

Veröffentlicht am: 25.11.2020, 12:11 Uhr - von: Sebastian

Gahr for Gahr is Advent, Gahr for Gahr feiern mor Weihnachtn, Gahr for Gahr reime mor de Fansterbelechting har, Gahr for Gahr renne mor im Advent wie verrickt noch Geschenke un über de Weihnachtsmärkte, Gahr for Gahr wart Stolln gebackn, Gahr for Gahr is in Neidorf de Mettn, Gahr for Gahr gibs ze Weihnachtn Streit dorham, Gahr for Gahr gieht mor über Weihnachtn viel of Besuch, Gahr for Gahr is mor noch de Weihnachtfeiertog 5 kilo schwerer, Gahr for Ghar… … Iech könnt noch a ganzes Stückl wetter machen, aber iech glaab is reicht.

Merkt ihr wos? Dare Aufzähling giehts wie dam Liedtext. S’is a scheenes Lied un is zeicht scheene Traditione auf. Doch hot‘s mit dor Weihnachtsbohtschaft an sich nischt ze tu. Mir lahm in ner Zeit, wu mir ganz viel Zeich machen könne, wu mir alles meechliche kaafn könne un wu’s viel gibt, wu mor sei Zeit nah wendn kah. Dos Schlachte do drah is, mor kah ah sei Harz an viel sinnloses Zeich nah hänge un seine Zeit vertue.

Schlocht mich bitte net un seid mir net bies, aber iech kennt mor denkn, unner Herrgott hot dos Virus geschickt, weil er unner Treibn nimmer ertrogn kunnt. Iech kennt mor denkn, er wullt, dos mir mol mehr Zeit hobn un gezwunge sei, mol noch ze denkn, wos nu wichtig is und wos net, wos bleim soll un wu mor wos annersch machen misst. Un do mahn iech alle Bereiche, of Arbit, dr Ham, im Verein un ah in dr Kirch.

Miech archern dorweil de Gottesdienste bei uns tüchtig. Mit viel Musik, un laang sood missn se sei, egal ob dos dor Gemeinde oder dor Gesundheit gut tut. Is muss alles nei gepackt warn, egal obs nu wichtig is oder net. Is hot mit deim Glabn aber net viel ze tu, wie oft un wie lang de Gottesdienst feierst. Bei uns in Neidorf rammelt ah su mancher Lügnbold, Betrüger oder Dieb jedn Sundich in de Kirch. Is wartn aber nischt nützn. Dei Glabn is wos zwischn Dir salber un Gott deim Vater, niemand sonst. Ner wenn du’s mitn Herrgott ehrlich maahnst, kaste dorfu ausgieh, dos er am Ende ah socht: Ja du bist mei Gung oder: Ja du bist meine Tochter.

Zerick zu dann Liedl. Is Raachermannl hoht niemandn ewos getah! Mir isses wichtig, de Mannle auf ze weckn un in Schwibbogn raus ze huhln, dos is hall wert in dare dunkln Zeit. Ah de Vesper und de Mettn wert mir fahln, genau wie is of Besuch gieh. Un iech vermiss ah de annern Gottesdienste bei uns, insbesondere de Bläsergottesdienste im Advent. Iech hoh aber Hoffning, dos mir vielleicht wos lerne. Dos mir lerne, wu sichs luhnt, unnere Zeit oder unner Harz nah ze hänge un wu mors besser bleim lossn. Iech hoff, dos sich Neies ausgedacht un ausprobiert wert un dos dor Mut do is, ah Altes hinner uns ze lossn.

Mir Bläser wulln im Advent un später in dor Weihnachtszeit wieder naus gieh un mit unnerer Musik in Leitn in unnerm Ort inne Fraad machen. Beim lauschn auf Advents und Weihnachtslieder kah mor ah Ruh un Ahdacht finden un überlegn wos wirklich wichtig is.

Wann und wu mor in dare Adventszeit unnerwachs sei, dos wissen mir itze noch net su richtig un mir sogns eich ah net. Wenn ihr wos hehrt, dann kippt ahfach a Fanster ah. Wenn mor uns nu im Dorf begegne solltn, laaft uns net hinner haar, lasst viel Platz ze uns un annere. Macht ruhig a Stückl wetter of eiern Spaziergang, mir sei laut sood. Dann könne mor hoffentlich ah alle Weihnachtn dr ham mit unnere Leit und net im Krankenhaus feiern. Kumme ze viele Leit ofn Haufn oder wert kah Abstand gehaltn, dann hern mor auf ze blosn un ginne unnere Waag.

Inne ruhige un besinnliche Adventszeit wünscht eich dor Posaunechor.